Мінсельгасхарч забараніў трымаць свіней у радыюсе 5 кіламетраў ад свінакомплексаў

Пастанова была зацверджана яшчэ 12 ліпеня і ўступіла ў сілу напрыканцы мінулага тыдня, перадае “Еўрарадыё”.

Згодна з дакументам, свіней неабходна ліквідаваць ля ўсіх свінакомплексаў незалежна ад таго, ёсць там ачаг захворвання на свіную чуму альбо няма. Неабходнасць знішчыць свіней у чыстых ад АЧС раёнах тлумачыцца “правядзеннем мерапрыемстваў па абмежаванні распаўсюду і знішчэння АЧС у арганізацыях закрытага тыпу”.

Еўрарадыё дазванілася ў пасёлак Белавежскі, што ў Брэсцкай вобласці. Там размешчаны вялікі свінакомплекс. У сельсавеце расказваюць, што людзей заклікалі выразаць свіней на падворках, яшчэ не маючы на руках тэксту міністэрскай пастановы.

Работнік сельсавета: “Да 15-га чысла далі людзям тэрмін. Парэкамендавалі спачатку, бо калі праводзілі сход, то пастановы яшчэ не было… А зараз людзі кожны дзень у сельсавет паведамляюць, колькі свіней зарэзалі”.

На цяперашні момант у Белавежскім і навакольных вёсках засталося каля 80 свіней. Людзі ратуюць маладняк, вывозячы далей ад свінакомплексу. Ёсць і ўпартыя сяляне. Такіх у сельсавеце збіраюцца “пераконваць” персанальна, адрасна дасылаючы пастанову Мінсельгасхарча.

У “Правілах барацьбы з афрыканскай чумой свіней у Беларусі”, зацверджаных пастановай Мінсельгасхарча №84 ад 22 снежня 2008 года аб “прафілактычным” забоі свіней няма ні слова. Згодна з імі, жывёл забіваюць толькі пры выяўленні ачага захворвання.

Нагадаем, што раней кіраўнік літоўскай Дзяржаўнай харчова-ветэрынарнай службы Ёнас Мілюс заяўляў, што ў Беларусі можа быць уведзеная поўная забарона на гадаванне свіней на хатніх падворках.