Факт арышту ксяндза Ўладзіслава Лазара пацвердзілі ў Рыма-каталіцкім касцёле

Пра гэта Радыё Свабода паведаміў часовы выканаўца абавязкаў прэс-сакратара Канферэнцыі каталіцкіх біскупаў у Беларусі айцец Юрый Санько: «Мы ведаем пра гэты факт, але не маем дакладнай інфармацыі, за што ён затрыманы. Чакаем, калі з’явяцца на гэты конт афіцыйныя паведамленні».

Юрый Санько зазначыў, што гэтая справа знаходзіцца ў руках дзяржаўных органаў, у прыватнасці, ёю займаецца нунцыятура (амбасада Ватыкану).

Разважаць на тэму, ці звязана затрыманьне ксяндза Ўладзіслава Лазара з агучаным у мінулую пятніцу Аляксандрам Лукашэнкам шпіёнскім скандалам, Юрый Санько адмовіўся, спаслаўшыся на той самы недахоп афіцыйнай інфармацыі.

Раней стала вядома, што каля месяца таму быў арыштаваны і змешчаны ў СІЗА КДБ ксёндз Уладзіслаў Лазар, пробашч парафіі Спаслання Святога Духа ў Барысаве.

У мінулую пятніцу Аляксандр Лукашэнка заявіў пра затрыманне супрацоўніка беларускіх спецслужбаў, які працаваў на замежныя дзяржавы праз прадстаўнікоў каталіцкай царквы:

«Мы нядаўна затрымалі аднаго са здраднікаў, які служыў у спецслужбах і які праз прадстаўнікоў каталіцкай царквы быў звязаны з замежнымі дзяржавамі».

Лукашэнка адзначыў журналістам, што гэты чалавек «не толькі здаваў інфармацыю, але з-за яго дзейнасці пацярпелі людзі, якія працуюць за мяжой».