Паўлу Севярынцу далі трохдзённы адпачынак

Личности

Увечары 20 ліпеня маці палітыка Таццяна Севярынец паведаміла БелаПАН, што Павел знаходзіцца ў дарозе да Віцебска, дзе жывуць Севярынцы. Дарога займае прыкладна восем гадзін. "Але гэта — калі ехаць прамым цягніком, калі з перасадкамі, то больш", — дадала Таццяна.

Такім чынам, прыблізна паўтара сутак з трох адпушчаных Севярынцу зойме дарога дадому і назад.

Апошнім разам кароткатэрміновы адпачынак, таксама трохдзённы, асуджанаму палітыку давалі на Вялікдзень, у маі.

Павел Севярынец асуджаны па крымінальнай справе аб масавых беспарадках у Мінску 19 снежня 2010 года. Падчас апошніх прэзідэнцкіх выбараў ён кіраваў выбарчым штабам кандыдата на пасаду кіраўніка дзяржавы ад аргкамітэта БХД Віталя Рымашэўскага. 16 мая 2011 года суд Заводскага раёна Мінска прыгаварыў яго да трох гадоў абмежавання волі на падставе ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх). 26 ліпеня 2012 года Севярынцу было адмоўлена ў амністыі.

Да завяршэння тэрміну пакарання палітыку застаецца тры месяцы — ён заканчваецца 19 кастрычніка. Міжнародныя праваабарончыя арганізацыі прызналі Паўла Севярынца палітычным зняволеным.