Памерла заснавальнік конкурсу "Брэнд года" Жанна Грынюк

Развітанне з Жаннай Грынюк адбудзецца сёння з 14 да 16 гадзін у Доме смутку на вуліцы Куляшова, 12, піша БелаПАН. Пахаванне пройдзе на яе радзіме — у гарадскім пасёлку Урэчча Любанскага раёна Мінскай вобласці.

Жанна Грынюк нарадзілася 3 верасня 1966 года. Скончыла з адзнакай факультэт прыродазнаўства МДПІ імя А.М.Горкага (зараз БДПУ імя Максіма Танка), аспірантуру і дактарантуру БДПУ па спецыяльнасці "Сацыяльная псіхалогія". Абараніла кандыдацкую дысертацыю па тэме "Эканамічнае мысленне". У 1998 годзе Грынюк прысвоена званне дацэнта.

Яна з'яўлялася заснавальнікам і дырэктарам Цэнтра сістэмных бізнес-тэхналогій SATIO, стваральнікам і старшынёй аргкамітэта прафесійнага конкурсу "Брэнд года" ў Беларусі, дырэктарам праграм NIMA (ЕС, Нідэрландскі інстытут маркетынгу) у Беларусі, сертыфікаваным трэнерам-кансультантам Еўрапейскай асацыяцыі навучання менеджараў CEEMAN, членам Грамадска-кансультатыўнага савета пры Адміністрацыі прэзідэнта, арганізатарам міжнародных канферэнцый і кангрэсаў.

Грынюк — аўтар больш як 80 публікацый у айчынных і замежных крыніцах і СМІ, навукова-практычнай манаграфіі.

У Жанны Грынюк засталіся двое сыноў 25 і 9 гадоў.