Транспамежны праект Еўрасаюзу дазволіць выратавальнікам з Гродна абнавіць абсталяванне

Пра гэта БелТА паведаміў начальнік Гродзенскага абласнога ўпраўлення МНС Пётр Коржык.

МНС вобласці прымае ўдзел у праекце міжнароднай тэхнічнай дапамогі "Паляпшэнне ўзаемадзеяння сістэм грамадзянскай абароны ў сферы кіравання надзвычайнымі сітуацыямі прыроднага характару ў транспамежным рэгіёне Літва-Латвія-Беларусь", які ажыццяўляецца пры фінансавай падтрымцы Еўрасаюза.

Праект прадугледжвае супрацоўніцтва па папярэджанню і рэагаванню на надзвычайныя сітуацыі ў прыродных і тэхнагенных сістэмах. Удзельнікі адпрацоўваюць мадэлі ўзаемадзеяння па абароне насельніцтва і навакольнага асяроддзя ў выпадку ўзнікнення надзвычайных сітуацый прыроднага і тэхнагеннага характару, абменьваюцца вопытам і інавацыйнымі падыходамі па інфармаванню насельніцтва і павышэнню кваліфікацыі персаналу.

Бюджэт праекта складае 895 тысяч еўра. У тым ліку Гродзенскаму абласному упраўленню МНС выдзелена 268 тысяч еўра. На гэтыя сродкі закупляецца аварыйна-ратавальная тэхніка і абсталяванне.

Як паведамілі ў МНС, нядаўна аўтапарк гродзенскіх ратавальнікаў папоўніўся ўжо новым аўтамабілем "Івека". Машына будзе выкарыстоўвацца пры тушэнні пажараў у лясных масівах і на тарфяніках, незаменная для падачы вады ў мясцовасці, дзе крыніцы вады размешчаны далёка ад месца пажару. Плануецца таксама набыць аварыйна-ратавальны аўтамабіль для Ашмянскага раёна.

У рамках праекта таксама прайшлі тактычныя вучэнні каля літоўскай вёскі Гірдзенай па ліквідацыі надзвычайных сітуацый прыроднага характару з гарэннем лесу. У іх прынялі ўдзел каля ста ратавальнікаў з трох краін, а таксама работнікі пагранічнай службы і лясніцтва, прыцягваўся авіяцыйны транспарт.