Віцебскую журналістку будуць судзіць за парушэнне заканадаўства аб СМІ

Адміністратыўную справу на Алену Сцяпанаву завёў Кастрычніцкі РАУС Віцебска на падставе арт. 22.9 ч.2 КаАП.

Паводле пратакола, Алена на працягу доўгага перыяду “ажыццяўляла прафесійную дзейнасць журналіста замежнага СМІ “Радыё Свабода” без адпаведнай акрэдытацыі”, паведамляе прэсавая служба Беларускай асацыяцыі журналістаў.

Між тым, адміністратыўны артыкул, на падставе якога ўзбуджана справа, гучыць як “парушэнне вызначанага парадку рассылкі абавязковых бясплатных асобнікаў перыядычных выданняў, распаўсюд эратычных выданняў, апублікавання СМІ абвяржэння, а таксама незаконны выраб і распаўсюд прадукцыі СМІ”.

Якім чынам стасуюцца паміж сабой гэтыя абвінавачанні, стане вядома сёння ў судзе.

Справу Алены а 15-й гадзіне пачне разглядаць Кастрычніцкі райсуд Віцебска. У выпадку прызнання журналісткі вінаватай ёй можа пагражаць штраф у памеры ад 20 да 50 базавых велічыняў.