Актывіста БХД Паўла Пракаповіча аштрафавалі на 25 базавых велічынь

Сябар аргкамітэту па стварэнні партыі "Беларуская Хрысціянская дэмакратыя" Павел Пракаповіч быў затрыманы 7 ліпеня ў Менску падчас правядзення акцыі, прысвечанай 13-й гадавіне знікнення журналіста Дзмітрыя Завадскага.

Актывіст праводзіў акцыю самастойна, таму пра сваё затрыманне здолеў даслаць СМС толькі раніцай 8 ліпеня, паведамляе прэсавая служба БХД.

У другой палове дня 8 ліпеня суд Савецкага раёну прыгаварыў Паўла Пракаповіча да штрафу ў памеры 25 базавых велічынь. Ён прызнаны вінаватым па арт. 23.34 КаАП (парушэнне парадку арганізацыі ці правядзення масавых мерапрыемстваў), нягледзячы на довады адваката, што выказванне адным чалавекам сваёй думкі не ёсць масавым мерапрыемствам.

Акцыя праходзіла ў межах кампаніі "Мы не забудзем!".