На мядзельскім Замку пройдуць раскопкі

У пачатку ліпеня плануецца правесці комплексныя археалагічныя даследаванні на паўвостраве Замак у Мядзеле, паведамляе "Рэгіянальная газета". Пройдуць яны на месцы, дзе ў 15 – пачатку 18 стагоддзя існаваў замак.

Праводзіць даследаванні будуць студэнты і валанцёры пад кіраўніцтвам кандыдата гістарычных навук Мікалая Плавінскага. Мяркуецца вызначыць межы раскопак, стварыць дакладны план тэрыторыі замка.

Даведка Службы інфармацыі "ЕўраБеларусі". Мікалай Плавінскі – беларускі археолаг і гісторык, кандыдат гістарычных навук. Займаецца вывучэннем пытанняў гісторыі старажытнарускай зброі, матэрыяльнай культуры насельніцтва Беларусі X –XIII стст., археалогіяй Полацкай зямлі і сумежных рэгіёнаў. Аўтар і сааўтар больш як 90 навуковых артыкулаў і 6 манаграфій. Увесну гэтага года кніга Мікалая Плавінскага “Узбраенне беларускіх земляў 10-13 стагоддзяў” запачаткавала першую навукова-папулярную серыю па ваеннай гісторыі Беларусі, заснаваную выдавецтвам "Галіафы".