Беларусь - пятая сярод удзельніц міжнароднай кампаніі "Жывая вясна"

"Вясна скончылася, а разам з ёй падыйшла да заканчэння міжнародная кампанія "Жывая вясна". На працягу чатырох месяцаў мы разам з вамі з цікавасцю назіралі за прылетам пяці птушак-пасланак вясны. Нагадаем, што гэта былі белы бусел, вясковая ластаўка, звычайная зязюля, чорны свіргуль і шчурка-пчалаедка", - паведамляе прэс-служба грамадскага аб'яднання "Ахова птушак Бацькаўшчыны".

Дзякуючы беларускім назіральнікам нашая краіна апынулася на пятым месцы сярод 40 краін-удзельніц кампаніі.

На сайце www.springalive.net па Беларусі было зарэгістравана 5510 назіранняў. Белых буслоў было адзначана 2.910, вясковых ластавак – 1.119, чорных свіргулеў – 846, звычайных зязюль – 620, а рэдкіх для нашай краіны шчурак-пчалаедак – 15. Трыдыцыйна ў гэтым годзе лідэрам стала Мінская вобласць з 4.840 назіраннямі.

На працягу кампаніі праходзіў конкурс "Гісторыі жывой вясны", пераможцамі якога сталі Руслан Богля, Анастасія Ліс і Карына Латц.