Падарожжа ў часы Паўстання Каліноўскага

Распрацоўка маршрута ажыццяўлялася ў межах грамадскай кампаніі “1863”, якая дзейнічае пры падтрымцы Міжнароднага кансорцыюму “ЕўраБеларусь”.

Прэзентацыйную экскурсію правядзе гід Цімафей Акудовіч. Маршрут плануецца афіцыйна аформіць у адпаведнасці з патрабаваннямі Нацыянальнага агенства па турызму.

У маршрут уваходзяць 6 пунктаў звязаных з падзеямі Паўстання 1863-64 гг. наагул і атрадам Вінцэнта Козела-Паклеўскага – у прыватнасці.

1. Вёска Плябань Маладзечанскага раёна. Удзельнікі экскурсіі агледзяць касцёл Найсвяцейшай Панны Марыі, што памятае яшчэ часы Паўстання, і старыя могілкі. На іх пахаваныя чацвёра ўдзельнікаў Паўстання, якія загінулі ў баі, што адбываўся непадалёк. Таксама

2. Вёска Латыголь Вілейскага раёну. Каля драўлянай царквы Святога Мікалая XVIII стагоддзя пабудовы гаворка пойдзе пра стаўленне да Паўстання праваслаўнай царквы і ўспрыняццё гэтай падзеі сялянамі. Гаворка пойдзе, у тым ліку, і пра тое, чаму частка сялянаў падтрымлівала паўстанне, а іншая адмовілася гэта рабіць.

3. Места Сэрвач Вілейскага раёну. Тут знаходзіцца разбураны родавы палац Козел-Паклеўскі – актыўных удзельнікаў Паўстання. Удзельнікі экскурсіі змогуць даведацца больш пра гэты выбітны шляхецкі род, а таксама агледзець родавы склеп Козел-Паклеўскіх.

4. Вёска Даўгінава Вілейскага раёну. Тут знаходзіцца касцё Святога Станіслава, які мае вельмі цікавую гісторыю будаўніцтва. Увага ўдзельнікаў экскурсіі будзе звернутая на гісторыю развіцця паўстанцкага руху і матывы, якімі кіраваліся актыўныя ўдзельнікі Паўстання.

5. Вёска Альковічы Вілейскага раёну. Тут знаходзіцца касцёл Адзведзінаў Найсвяцейшай Панны Марыі. На ягоным месцы ў часы паўстання знаходзіўся драўляны касцёл, у якім зачытваўся маніфест Паўстання.

6 Вёска Уладыкі Вілейскага раёну. Каля вёскі знаходзіцца пахаванне прыкладна 70 ўдзельнікаў атрада Вінцэнта Козел-Паклеўскага, які быў разбіты царскімі войскамі якраз у гэтым месцы. На месцы пахавання ўсталяваны вялікі крыж. Тут удзельнікам экскурсіі распавядуць пра завяршэнне Паўстання на Беларусі.