Мінюст у трэці раз адмовіў у рэгістрацыі кампаніі “Гавары праўду”

Устаноўчы сход быў праведзены 13 красавіка, і 8 траўня падалі дакументы на рэгістрацыю грамадскага аб’яднання, піша Радыё Свабода. Адказ з міністэрства павінен быў прыйсці да 8 чэрвеня, але ліст з Мін’юста датаваны 12 чэрвеня, патлумачыў актывіст “Гавары праўду” Сяргей Вазняк:

“То бок сам Мін’юст парушыў тэрміны, якія законам дае на рэгістрацыю ці матываваную адмову ў рэгістрацыі. То бок у нас рэгістрацыяй займаецца дзяржорган, які сам парушае заканадаўства”.

Паводле Вазняка, у лісце падаюцца дзве прычыны адмовы ў рэгістрацыі.

Чыноўнікі палічылі, што тэрмін дзеяння гарантыйнага ліста (а ён быў да 31 мая) на юрыдычны адрас скончыўся.

“Але гэта не з’яўляецца парушэннем, бо на момант падачы ў нас быў гарантыйны ліст. І яны маглі папрасіць працягу дзеяння гэтага ліста. То бок гэтае парушэнне не такое, якое немагчыма ліквідаваць. А ў законе гаворыцца, што адмаўляецца ў рэгістрацыі толькі тады, калі парушэнні нельга ліквідаваць", — патлумачыў Вазняк.

Другую прычыну чыноўнікі знайшлі ў тым, што нібыта не вызначаны колькасны склад праўлення.

“Ён у нас вызначаны: 5 чалавек, і ёсць спіс паводле прозвішчаў. Гэта ўжо проста лухта, якую немагчыма каментаваць”, — сказаў Вазняк.

Сяргей Вазняк паведаміў, што рашэнне Мін’юста будзе абскарджана ў Вярхоўным судзе, а потым зноў будуць пададзеныя дакументы на рэгістрацыю ў Мін’юст. Актывіст таксама паведаміў, што гэта была ўжо трэцяя спроба зарэгістравацца. Адмову з боку ўладаў Сяргей Вазняк пракаментаваў так:

“З разумнага пункту гледжання цяжка адказаць на гэтае пытанне, бо дзяржаве ж выгадней, калі дзейнічаюць зарэгістраваныя арганізацыі. Мы ўсё роўна працуем. І калі мы працуем без рэгістрацыі, у дзяржавы меней магчымасцяў кантраляваць дзейнасць арганізацыі. У іх рэальна проста не хапае розуму”.