Паўстанне Каліноўскага ўвойдзе ў экскурсійныя маршруты

Маршрут быў распрацаваны кампаніяй “1863”, якая дзейнічае прыпадтрымцы “ЕўраБеларусі”.

Падчас прэзентацыі маршруту, на якую будуць запрошаныя прадстаўнікі Нацыянальнага агенства па турызму, экскурсію правядзе гід Цімафей Акудовіч.
Маршрут уключае ў сябе некалькі пунктаў, звязаных з паўстанцкім атрадам Вінцэнта Козела-Паклеўскага. Пра сам маршрут службе інфармацыі “Еўрабеларусі” распавёў Цімафей Акудовіч:

- Першы прыпынак – вёска Плябань Маладзечанскага раёна. Там знаходзіцца касцёл Найсвяцейшай Панны Марыі, які існаваў яшчэ ў часы паўстання. Таксама у гэтай вёсцы ёсць старыя могілкі, дзе знаходзіцца пахаванне чатырох паўстанцаў, якія загінулі ў баі недалёка ад гэтага месца.

Наступны прыпынак – вёска Латыголь. Там знаходзіцца царкваXVIII стагоддзя. У гэтым месцы мы звернем увагу на стаўленне сялянаў да гэтага паўстання: чаму адныя падтрымалі яго, іншыя – не. Таксама зварнем увагу на пазіцыю праваслаўнай царквы.

Далей – мястэчка Сэрвач, дзе знаходзяцца руіны родавай сядзібы Козел-Паклеўскіх. Безумоўна, будзе расповяд пра гэты вельмі цікавы шляхецкі род. Сам палац ужо разбураны, але захаваліся бровар, кузня і пахавальная капліца Козел-Паклеўскіх.

У вёсцы Даўгінава знаходзіцца касцёл Святога Станіслава з цікавай гісторыяй будаўніцтва. У гэтым месцы экскурсія будзе прысвечана гісторыі пашырэння паўстанцкага руху: з якімі мэтамі людзі ішлі ў гэты рух, чаго яны хацелі і г.д.

Гэтая ж тэма будзе працягнутая і ў Альковічах, дзе ў старым драўляным касцёле зачытваўся маніфест паўстання.

І апошні пункт - вёска Уладыкі. Там на ўскрайку леса каля вёскі стаіць вялікі крыж на месцы пахавання паўстанцаў. Дакладная лічба загінулых невядомая, прыкладна – каля 70 чалавек. Менавіта ў бітве, якая адбылася ў тых мясцінах, на беразе рэчкі Ілля, і быў разбіты атрад Вінцэнта Козел-Паклеўскага. Там экскурсія будзе сфакусаваная на завяршэнні паўстанцкага руху.

Яшчэ адзін экскурсійны маршрут – у бок Мілавідаў (месца вядомай бітвы падчас Паўстання) ды Слоніма – будзе прэзентаваны напрыканцы ліпеня.