Кіраўнік Глыбокага хоча, каб незалежныя журналісты прыбіралі смецце

Размову пра незалежную прэсу старшыня райвыканкама завёў на сустрэчы з глыбоцкімі бізнэсоўцамі. На ёй прысутнічаў журналіст Зміцер Лупач, які адначасова з’яўляецца прадпрымальнікам. Магчыма, прысутнасць Лупача і падахвоціла Морхата зрабіць рэзкую заяву.

- Разумееце, некаторыя з вас, (я там бачыў, Лупач заходзіў), дрэўца, кветкі не пасадзілі, (…) Вы вельмі шмат бачыце, давайце ў першых шэрагах выйсці і падняць смецінку раніцай… Я хачу сказаць адно, калі чытаеш гэта ўсё, не буду называць і лаяцца, і лічыш, якія вы ўсё-такі… Адно слова хачу сказаць… І думаеце паводле меры сваёй разбэшчанасці. Я яшчэ раз кажу, у вас толькі адно ў галаве: зладзейства і іншыя пытанні. Я хачу сказаць усім яшчэ раз: за скажэнне інфармацыі будзе сур’ёзная размова. Я не дазволю, каб на апазіцыйных сайтах скажаць пытанні аб жыцці і дзейнасці глыбачанаў, ганьбіць гонар і годнасць гэтага краю, - сказаў Алег Морхат.

Рэдакцыя Westki.info, мясцовага інтэрнэт-рэсурсу дае наступны каментар заяве Морхата:

- У кожнага свая работа – каб падтрымліваць парадак у горадзе, існуе прадпрыемства ЖКГ, а каб пісаць навіны – ёсць сродкі масавай інфармацыі. Думаю, ніхто не папракае Морхата за тое, што ён не мые падлогу ў сваім кабінеце і не палівае кветкі ў будынку райвыканкама.

Сродкі масавай інфармацыі на тое і існуюць, каб падаваць чытачам інфармацыю пра тое, што дзе адбываецца. Крытычная ацэнка рэчаіснасці – гэта прыкмета і здаровага розуму чалавека, і здаровага сродка масавай інфармацыі, хоць Westki.info, хоць The New York Times.

Раённыя газеты падпарадкаваныя райвыканкамам, таму не здольныя крытычна ацэньваць дзеянні мясцовых уладаў. Паводле “раёнак”, старшыні райвыканкамаў ніколі не памыляюцца, а органы ўлады ніколі не парушаюць заканадаўства і маральныя нормы.

А мы на тое і незалежныя, што адказваем за напісанае толькі перад грамадствам. Калі ўлада робіць нешта нядобрае – не шануе нацыянальныя каштоўнасці, парушае правы працоўных, парушае права на свабоду аб’яднанняў і свабоду выказвання – мы пра гэта пішам, бо гэта важна для грамадства.

Мы ніколі не хлусім і не скажаем інфармацыю свядома. Мы імкнемся працаваць так, каб можна было без сораму паглядзець у вочы любому з чытачоў – хоць чалавеку з апазіцыі, хоць чалавеку з райвыканкама.

Калі ж Морхату не падабаецца, што “Весткі” не заўсёды яго хваляць – хай чытае “Веснік Глыбоччыны”.