Апазіцыйная першамайская дэманстрацыя ў Брэсце прайшла без затрыманняў

Па падліках арганізатараў дэманстрацыі, у ёй прынялі ўдзел каля 200 чалавек, піша Радыё Свабода. Людзі прыходзілі сем’ямі разам з дзецьмі.

Шэсце ад праспекта Машэрава дайшло да аблвыканкаму, дзе арганізатары акцыі раздалі інтэрв’ю. З прамовай выступіў кіраўнік мясцовай філіі БСДП(Г) Ігар Маслоўскі.

Луналі бел-чырвона-белыя сцягі, партыйныя сацыял-дэмакратычныя, а таксама сцягі камуністычныя і БССР. Удзельнікі неслі плакаты з надпісамі: «Народны кантроль: выбары, грошы, улада», «Сёння расійская вайсковая база, заўтра – 22 чэрвеня», «Кошт навучання у ВНУ прывязяць да ўзроўню інфляцыі».

Затрыманняў не было. Міліцыя і людзі ў цывільным з камерамі суправаджалі і здымалі дэманстрантаў на працягу шэсця.