Днi беларускай культуры праходзяць у Харкаве

23 красавіка ў Харкаўскім акадэмічным тэатры оперы і балета на ўрачыстай цырымоніі адкрыцця Дзён беларускай культуры выступіў беларускі пасол Валянцін Вялічка. Дыпламат прадставіў удзельнікам мерапрыемства інфармацыю аб дынаміцы і перспектывах супрацоўніцтва паміж Беларуссю і Украінай у розных сферах. Асаблівая ўвага надавалася значнасці развіцця ўзаемадзеяння ў сферы культуры, піша Радыё Рацыя.

У гэты ж дзень у межах Дзён беларускай культуры адбыўся канцэрт беларускіх народных калектываў "Жывiца" (Мазыр), Artgaim-kvintet (Гомельскі раён), выстава вырабаў беларускіх народных майстроў і ўзораў дзіцячай творчасці.

Сёння Дні беларускай культуры будуць працягвацца паказам дакументальнага і мастацкага кіно.

Падчас знаходжання ў Харкаве Вялічка правёў сустрэчы са старшынёй Харкаўскай абласной дзяржаўнай адміністрацыі Міхаілам Добкіным і кіраўніком горада Генадзем Кернесам, падчас якіх бакі абмеркавалі актуальныя пытанні ўзаемадзеяння Беларусі з украінскім рэгіёнам.