Суд Ашмянскага раёну прызнаў альбом “Belarus Press Photo 2011” экстрэмісцкім выданнем

З фотажурналістаў будзе спагнана па 200 тысяч рублёў дзяржаўнай пошліны і яшчэ па 17,5 тысячы рублёў судовых выдаткаў, піша Радыё Свабода. Рашэнне суду можна абскардзіць цягам 10 дзён у Гродзенскім абласным судзе.

З пазовам «Аб прызнанні інфармацыйнай прадукцыі экстрэмісцкімі матэрыяламі» ў суд звярнулася ўпраўленне КДБ Беларусі па Гродзенскай вобласці.
У суд выклікалі фатографаў Юлію Дарашкевіч, Вадзіма Заміроўскага і Аляксандра Васюковіча.

Менавіта ў іх 12 лістапада 2012 году супрацоўнікі памежнага пераходу «Каменны лог» забралі 41 асобнік фотаальбома, які журналісты перавозілі на прыватным аўтамабілі з Літвы.

Экспертамі выступілі начальнік упраўлення ідэалагічнай працы Гродзенскага аблвыканкаму Павел Скрабко і тры выкладчыкі Гродзенскага дзяржуніверсітэту імя Янкі Купалы.