Беларускай мове вернуць статус асноўнай мовы навучання ў мінскай гімназіі №4

Летась дакумент без папярэдняга інфармавання бацькоў навучэнцаў быў адкарэктаваны, у выніку чаго разам з беларускай мовай навучання і выхавання была ўведзеная руская, піша Радыё Свабода. Такі паварот падзеяў выклікаў незадавальненне часткі бацькоў, якія запатрабавалі тлумачэнняў ад кіраўніцтва гімназіі і вышэйшых органаў.

21 лютага, у Міжнародны дзень абароны роднай мовы, вядомы скульптар Генік Лойка выйшаў да ўстановы, дзе вучыліся і навучаюцца цяпер трое ягоных дзяцей, з плакатам «Віншуем з Міжнародным днём абароны роднай мовы! Гімназія № 4 была апошняй беларускамоўнай школай». Неўзабаве пасля пачатку акцыі Лойка быў затрыманы і асуджаны на 5 сутак адміністратыўнага арышту за «парушэнне правілаў арганізацыі і правядзення масавага мерапрыемства».

Тым часам бацькі іншых навучэнцаў гімназіі распачалі збор подпісаў за перагляд моўнай часткі статуту — было сабрана некалькі дзясяткаў подпісаў, якія перадалі ва Ўпраўленне адукацыі Фрунзенскага раёну Мінску. На падставе гэтага звароту чыноўнікі ад адукацыі прымусілі адміністрацыю гімназіі вярнуць у беларускамоўную школу родную мову. Да 15 красавіка кіраўніцтва гімназіі мусіць звярнуцца ў Камітэт адукацыі Мінгарвыканкаму з хадайніцтвам унесці ў статут адпаведныя змены.