Генадзь Бураўкін: Не бачна, што ўлады прынялі захады, каб такое ніколі не паўтарылася

Такое меркаванне ў размове са Службай інфармацыі “ЕўраБеларусі” выказаў вядомы беларускі паэт Генадзь Бураўкін.

“Калі казаць вобразна, то першае, што можна заўважыць, што грамадства скаланулася”, - адзначыў ён.

“Можа быць, для чынавенства ды афіцыйных структур гэты спалох і да гэтага часу застаўся неасэнсаваны і незразумелы. Я не бачу таго, каб нашы ўлады прынялі сур’ёзныя захады для таго, каб падобнае ані блізка не паўтарылася. Бо тое, што на даволі доўгі час былі выстаўленыя міліцыянты каля ўваходаў у метро і на вакзалах, мы бачым, што зараз гэтага ўжо няма, - заўважыў Генадзь Бураўкін. – А вось тое глыбіннае, што дзяржава павінна асэнсаваць і зрабіць, я гэтага не адчуваю і не бачу”.

Што тычыцца ўспрыняцца гэтай жахлівай падзеі грамадствам, то, як заўважыў літаратар, многія людзі засталіся незадаволеныя празмерна хуткім даследваннем і разглядам крымінальнай справы аб тэракце. “Літаральна за нейкія гадзіны выявілі, знайшлі і арыштавалі вінаватых. У той час, калі ідуць гады, і не могуць выйсці на след ні тых, хто выкраў Захаранку і Ганчара. А тут так хуценька ўсё зрабілі, так хутка падрыхтавалі працэс, чамусці не ўлічылі ўсе магчымасці для таго, каб зняць сумненні. Я думаю, што ў нейкай часткі грамадства гэта выклікала трывогу і жаданне задумацца, а ці ўсё ў нас добра”, - сказаў Генадзь Бураўкін.

Таксама, на думку паэта, выбух у метро стаўся нагодай для роздумаў пра вечнае: “Калі адбываюцца такія падзеі, калі гіне столькі людзей, то сапраўды, акрамя спалоху, людзі яшчэ задумваюцца, якая гэта тонкая і вельмі ненадзейная справа – чалавечае жыццё, як грамадства і дзяржава павінны рабіць усё, каб у кожнага чалавека захаваць дадзенае яму Богам права жыць на гэтай зямлі…”