Беларусь на другім месцы па колькасці зняволеных

Пра гэта гаворыцца ў справаздачы па выніках маніторынга месцаў прымусовага ўтрымання, якая падрыхтавана Праваабарончым цэнтрам "Вясна" пры ўдзеле эксперта - юрыста Паўла Сапелкі. Па ягоных словах, стан пеніцэнтыярнай сітэмы адлюстроўвае стан грамадства. Але людзям у няволі нашмат цяжэй.

«Яны пазбаўленыя многіх механізмаў, якія маглі б ім дазволіць аднавіць парушаныя правы. На жаль, дзяржава не ў поўнай меры ўсведамляе адказнасць за лёсы гэтых людзей. І ў гэтай справаздачы зроблена спроба аб’яднаць усе праблемы, якія стаяць перад зняволенымі. Зразумела, што гэта толькі пачатак працы. Яна будзе працягвацца, але агульнае ўяўленне ўжо можна атрымаць», - перадае Радыё Рацыя словы юрыста.

Па словах Паўла Сапелкі, нягледзячы на некаторыя пазітыўныя тэндэнцыі, Беларусь застаецца адным з лідараў па колькасці зняволеных. Яна адстае толькі ад Расіі і значна апярэджвае іншыя краіны-суседкі. Так, калі ў Беларусі на 100 000 насельніцтва прыходзіцца 405 зняволеных, то на Украіне 325 чалавек, у Літве - 314, Латвіі - 297, у Польшчы - 218 чалавек. Паказчыкі Заходняй і Паўночнай Еўропы ў 4 - 6 разоў меншыя за беларускія.