«Stand by/За Беларусь»: новы воблік Радзімы

«Калекцыя фотагісторыі стварылася для таго, каб распавесці пра рэчы, пра якія раней ніхто не казаў. Каб паказаць Беларусь такой, якой яе не пабачыш на афіцыйным тэлебачанні. Увогуле такія праекты трэба рабіць, каб суб’ектыўна і вельмі проста выказвацца на вельмі сур’ёзныя тэмы, якія нас непакояць, якія нас трымаюць за жабры», — заявіў аўтар ідэі «Stand by/За Беларусь» фатограф Андрэй Лянкевіч.

Выданне аб’ядноўвае некалькі фотапраектаў з Беларусі і Польшчы, перадае Радыё Свабода.

Андрэй Лянкевіч стварыў для праекту калекцыю дыптыхаў «Да пабачэння, Радзіма», на якіх паказаў узятыя з GoogleMaps вуліцы Мінску разам з фатаздымкамі герояў вайны, у гонар якіх яны названыя.

Рафал Мілах — аўтар праекту «Пераможцы», у якім адлюстраваныя пераможцы беларускіх конкурсаў — ад агульнанацыянальных да лакальных.

Адам Панчук рабіў фотадаследаванне таго, як беларусы апранаюцца і як сочаць за модай.

Агнешка Райс здымала жанчын, якія ваявалі ў Другую сусветную вайну.

Праект Яна Брыкчынскага мае назву «Некрануты лес». У ім фатограф паказаў, як беларусы прыстасоўваюць да жылых памяшканняў рэчы, прынесеныя з лесу.

Юстына Мельнікевіч здымала беларусак, якія выходзяць замуж за замежнікаў.

А Манца Юван — прадстаўнікоў беларускай супольнасці ў Нью-Ёрку.

Прэзентацыя пачнецца 21 сакавіка а 19 гадзіне ў фатастудыі «Зьнята» (Кастрычніцая вуліца, 19м).