Тадэвуш Кандрусевіч: Чакаем сустрэчы з Папам на беларускай зямлі

“Калі 11 лютага 2013 г. папа Бенэдыкт XVI аб’явіў аб сваім сыходзе з пасады наступніка святога апостала Пятра ў сувязі са станам здароўя і для дабра касцёла, то гэтае яго рашэнне было ўспрынята як грымоты з яснага неба”, - пачаў свой зварот арцыбіскуп.

“Пасля 40 дзён, 13 сакавіка, з балкона базылікі святога Пятра ў Ватыкане ўрачыста прагучалі словы: «Habemus Papam» — «Мы маем Папу», абвяшчаючы гораду і свету, што быў выбраны новы Пантыфік”, - напісана ў звароце, размешчаным на сайце каталіцкага касцёлу ў Беларусі.

“Папа Францішак нарадзіўся ў Аргенціне ў 1936 г., атрымаў святарскае пасвячэнне ў 1969 г., біскупам стаў у 1992 г., кардыналам – у 2001 г. Асабіста я меў магчымасць спаткацца з ім некалькі разоў. Адзін са святароў архідыяцэзіі Буэнас-Айрэс працаваў і далей працуе пробашчам у Ніжнім Ноўгарадзе, і адсюль маё знаёмства з новым Папам”,- распавёў Тадэвуш Кандрусевіч.

Ён адзначыў, што “Папа Францішак з’яўляецца першым Папам-езуітам, першым Папам з Лацiнскай Амерыкi і першым Папам, які абраў сабе такое імя”. “Ён прафесар тэалогіі, чалавек малітвы і вялікай пакоры, мужны абаронца традыцыйных хрысціянскіх каштоўнасцяў і сацыяльнай справядлівасці”, - апісаў новага Пантыфіка мітрапаліт Тадэвуш Кандрусевіч.

“Католікі Беларусі з удзячнасцю Богу і надзеяй прынялі абранне новага Папы. Яны выказваюць яму сваю пашану і паслухмянасць, бачаць у ім добрага пастыра, які павядзе іх у новы час і будзе іх духоўна падтрымліваць. Мы чакаем сустрэчы з новаабраным Папам на беларускай зямлі”, - напісаў мітрапаліт Мінска-Магілёўскі.