Вядомую спартcменку з інваліднасцю не прапусцілі ў начны клуб

“У ноч на восьмага сакавіка прыехалі ўчатырох да клуба “Тытан”. Загадзя зарэзервавалі столік. Хацелі, як кажуць, замачыць маю бронзу чэмпіянату Еўропы [па лыжных гонках], адзначыць Дзень народзінаў сяброўкі. Але ахова нас не прапусціла нават на ганак”, ― распавяла Людміла Ваўчок у размове з “Еўрарадыё”.

“Сказалі: “У нас там другі паверх, для вас не прадугледжана, можа ўтварыцца аварыйная абстаноўка, ― працягнула расповед спартсменка. ― Спачатку сам ахоўнік мяне не пусціў, потым паклікаў свайго начальніка. І ― ад варот паварот, культурна адшылі. Мы проста развярнуліся і сышлі. Вечар быў сапсаваны. Таму пазаўчора літаральна паехала я ў “Тытан” і зрабіла запіс у кнізе скаргаў і прапановаў”.

“Я хаджу па такіх месцах рэдка. І такога ніколі раней не было. У Лондане пасля п’едэсталу пайшлі на дыскатэку, і ўсё было цудоўна. Там наадварот людзі з абмежаванымі здольнасцямі выходзяць у людзі, і не баяцца, і не саромеюцца, настрой свой добры паказваюць. А ў нас у гэтым плане праблемы глабальныя”, - канстатавала Людміла Ваўчок.