Супраць міліцыянтаў з Ліды завялі крымінальную справу за здзекі з затрыманых

Супраць іх заведзеная крымінальная справа паводле артыкулу “перавышэнне ўлады або службовых паўнамоцтваў, учыненыя асобай, якая займае адказнае становішча, альбо якія пацягнулі цяжкія наступствы, а таксама наўмыснае здзяйсненне службовай асобай дзеянняў, якія відавочна выходзяць за межы правоў і паўнамоцтваў, дадзеных ёй па службе, спалучанае з гвалтам, пакутай ці абразай пацярпелага альбо ужываннем зброі або спецыяльных сродкаў”, піша Радыё Свабода.

У справе праходзяць: рапаршчык Віталь Александровіч, прапаршчык Аляксей Скапец, прапаршчык Аляксей Багдзевіч, старшы сяржант Аляксей Строк, сяржант Андрэй Талайка.

У ноч на 18 лістапада 2012 году Іван і Багдан Шкурко адпачывалі ў дыска-бары «Праспект» у Лідзе на праспекце Перамогі. Паводле версіі братоў Шкурко, міліцыянты патрульна-паставой службы, якіх выклікаў адміністратар бару, пачалі іх беспрычынна збіваць. Багдану Шкурко пырснулі ў твар пярцовым газам, а з Іванам, які паспрабаваў дапамагчы брату, абышліся яшчэ больш жорстка — як казаў Іван Шкурко, міліцыянты адвезлі яго на пустку, дзе памачыліся на галаву. Калі гэтая гісторыя стала вядомая грамадскасці, з ініцыятывы раённай міліцыі на Івана Шкурко ў Следчым камітэце завялі крымінальную справу паводле абвінавачання ў супраціве дзеянням міліцыі.