Маладыя хрысціянскія дэмакраты абскарджваюць адмову ў рэгістрацыі ў Вярхоўным судзе

Як адзначыла старшыня аргкамітэту МХД Марына Хоміч, спадзявацца на рэгістрацыю нават праз суд не даводзіцца, піша прэс-служба БХД.

"Але мы хочам пабачыць тых, хто нам адмовіў, і як яны "згодна з законамі" будуць тлумачыць гэтую адмову", - падкрэсліла Марына Хоміч.

Для адмовы былі знойдзеныя тры падставы. Першая з іх заключаецца ўтым, што, паводле Мінюста, заснавальнікі ў дакументах нібыта напісалі несапраўдныя дадзеныя пра свае месцы працы, а значыць, яны, нібыта, не прысутнічалі на ўстаноўчым сходзе. У спіс тых, хто нібыта падаў несапраўдныя звесткі, патрапіла і намесніца старшыні МХД Вольга Кавалькова, якая была сакратаркай сходу.

Другая прычына для адмовы – дакументы, якія патрабаваў Мінюст насуперак заканадаўству і якія МХД адмовілася прадстаўляць, у тым ліку дамова з арандатарам памяшкання. 

Таксама, па версіі Мінюста, ставаральнікі МХД у статуце арганізацыі парушылі закон Рэспублікі Беларусь аб правапісе беларускай мовы, у прыватнасці параграфы 33 і 63 пра напісанне вялікіх літар і двукоссяў у назве арганізацыі.