Прэміяй «Рыцар году» уганараваная праваабаронца Раіса Михайлоўская

Личности

Раісу Міхайлоўскую, кіраўнічку «Беларускага дакументацыйнага цэнтру», адзначылі за «арганізацыю грамадскай абароны затрыманых і асуджаных з палітычных меркаванняў, а таксама за значны ўнёсак у захаванне гістарычнай і юрыдычнай спадчыны беларусаў», піша Радыё Свабода.

Згодна з традыцыяй ганаровую грамату «Рыцара году» Раісе Міхайлоўскай павінен быў уручаць мінулагодні намінант. Аднак зрабіць гэта было немагчыма. Апошні лаўрэат, былы кандыдат у прэзідэнты Мікола Статкевіч — за кратамі. І таму ганаровы абавязак узяла на сябе ягоная жонка — Марына Адамовіч. Яна назвала Раісу Міхайлоўскую «сапраўдным рыцарам у жаночым абліччы»:

«Рая — летапісец, Рая — захавальнік. Яна захоўвае для гісторыі, для будучай нашай Беларусі факты, якія шмат каму хацелася, каб растварыліся ў часе і прасторы. І я думаю, што яе праца дачакаецца свайго часу, бо нічога не бывае дарэмна. Гэта вельмі сціплая адзнака таго, што ёсць такі чалавек, як Раіса Міхайлоўская. Раечка — сапраўдны рыцар у жаночым абліччы».

Калі ж апошняй слова атрымала новая намінантка, дарэчы — першая жанчына за дзевяць гадоў існаваньня прэміі, яна казала пераважна не пра сябе. Раіса адзначыла найперш працу адвакатаў падчас судовых працэсаў Плошчы 2010 году. Яна згадала, што хоць гэтыя людзі і самі пацярпелі, але яны сваімі заявамі, сваімі паводзінамі, сваім майстэрствам падчас працэсаў зрабілі вельмі шмат для інфармавання грамадства. І, як лічыць намінантка, добрай справай было б выдаць кніжку з іхнімі выступамі на судовых працэсах. Такое выданне стала б «залатой кніжкай беларускай адвакатуры».