Праваабаронцы заступіліся за Андрэя Гайдукова

“Беларускія праваабарончыя арганізацыі патрабуюць галоснасці і захавання ўсіх працэсуальных гарантый абвінавачанаму ў здрадзе дзяржаве Андрэю Гайдукову”, - гаворыцца ў заяве, размешчанай на сайце ПЦ “Вясна”.

“Улічваючы характар прад'яўленых Андрэю Гайдукову абвінавачванняў, заклікаем кампетэнтныя органы Рэспублікі Беларусь пры правядзенні крымінальнага пераследу Андрэя Гайдукова забяспечыць належную абарону і рэалізацыю яго правоў у адпаведнасці з заканадаўствам Рэспублікі Беларусь і міжнароднымі абавязацельствамі, прынятымі краінай перад сваімі грамадзянамі і міжнароднай супольнасцю, - заяўляюць праваабаронцы. – Асобы, вінаватыя ў такіх парушэннях, павінны быць прыцягнутыя да адпаведных мераў адказнасці”.

Таксама Вясна" і "Беларускі Хельсінкскі Камітэт заклікалі праваахоўныя органы “забяспечыць інфармаванне грамадскасці пра хаду расследавання і неабходную публічнасць маючага адбыцца судовага разбіральніцтва па дадзенай справе”.

Нагадаем, Андрэй Гайдукоў быў затрыманы 8 лістапада 2012 года ў Віцебску. Як паведаміў тады Цэнтр інфармацыі і грамадскіх сувязяў КДБ, Гайдукоў "быў затрыманы супрацоўнікамі КДБ у момант закладкі схованкі са звесткаім, якія цікавяць замежныя спецслужбы". Была ўзбуджана крымінальная справа па ч.1 арт 356 Крымінальнага кодэксу РБ (здрада дзяржаве ў форме правядзення агентурнай дзейнасці).