Уручэнне літаратурных прэмій “Залаты Апостраф” адбудзецца 22 лютага

У намінацыі “Паэзія” у шорт-ліст патрапілі: Анатоль Брусевіч (“Позірк у паўзмрок”. Вершы, №60), Алесь Разанаў (“Столькі і гэтулькі”. Пункціры, №57), Антон Рудак (“Музыка ў паветры”. Вершы, №59), Іна Снарская (“Ад сэрца да сэрца – дарога”. Вершы, №58), Віка Трэнас (“Голас крыві”. Вершы, №58), паведамляе сайт Саюза беларускіх пісьменнікаў.

Прэтэндэнтамі на “Залаты Апостраф” у намінацыі “Проза” сталі: Сяргей Вераціла (“Чай з мятай, цыгарэта з ментолам”, Апавяданне, №56), Валеры Гапееў (“Мы нікому пра гэта не раскажам”. Урывак з ненапісанага рамана, №57), Павел Ляхновіч (“Зялёны дуб”. Аповесць, №58), Алесь Паплаўскі (“Lapido”. Аповесць, №58), Алесь Усеня (“Мой лістапад…” Згадкі, №№56-58).

А ў намінацыі “Дэбют” адзначаныя наступныя аўтары: Зміцер Баяровіч (“З Новым ходам!” Зацемкі, №59), Юля Бо (“Гэта не пра любоў”, Вершы, №56), Вераніка Кашкан (“Не пакідай мяне, голас!” Вершы, №58), Яўгенія Руль (“Два парашуцікі”, Апавяданне, №58), Марына Яўсейчык (“Казкі лесу”, №61).

Лаўрэатам прэміі можна стаць адзін раз, і таму пераможцы мінулых гадоў не ўключаюцца ў лік намінантаў.

Цырымонія ўганаравання адбудзецца 22 лютага (пятніца) у кнігарні “логвінаЎ” (пр. Незалежнасці, 37А). У вечарыне возьмуць удзел сёлетнія пераможцы (іх імёны будуць абвешчаны непасрэдна на вечарыне), а таксама лаўрэаты мінулых гадоў — Уладзімір Някляеў, Леанід Дранько-Майсюк, Віктар Казько, Людміла Рублеўская. Спецыяльны госць — Алесь Камоцкі. Пачатак у 18.30. Уваход вольны.