Палітзняволены Васіль Парфянкоў 9 лютага выйдзе на волю

29 траўня 2012 года Васіль Парфянкоў быў асуджаны паводле артыкула 421 Крымінальнага кодэксу Рэспублікі Беларусь суддзём Першамайскага раёну Менску Сяргеем Бандарэнкам за парушэнні ўмоваў прафілактычнага нагляду. Прэвэнтыўны нагляд тэрмінам на адзін год, у парушэнні якога прызнаны вінаватым былы палітвязень, быў усталяваны за ім з 5 студзеня 2012 году. Падставай для гэтага стаў удзел Парфянкова ў грамадска-палітычным жыцці, піша сайт Праваабарончага цэнтру “Вясна”.

24 ліпеня Менскі гарадзкі суд не задаволіў касацыйную скаргу Парфянкова на прысуд аб арышце на 6 месяцаў за невыкананне умоваў прэвэнтыўнага нагляду, усталяванага судом. 9 жніўня 2012 г. і Васіль Парфянкоў быў узяты пад варту ізноў.

17 лютага 2011 года Парфянкова асудзілі па крымінальнай справе аб масавых беспарадках 19 снежня 2010 года да 4 гадоў зняволенна. 11 жніўня 2011 года ён быў памілаваны прэзідэнтам і вызвалены.

Праваабаронцы адзначалі, што калі ў снежні 2013 года разглядалася пытанне пра магчымасць ўмоўна-датэрміновага вызвалення, то Васілю Парфянкову было адмоўлена менавіта на той падставе, што ён не стаў на шлях выпраўлення і парушае правілы адбывання пакарання. Дарэчы, за ўвесь гэты час ён не змог нават патэлефанаваць дадому родным, і ягоныя стасункі са светам былі толькі праз ліставанне і праз сустрэчы з адвакатам, пішуць праваабаронцы.

Сёлета чакаецца таксама вызваленне яшчэ двух палітвязняў: Паўла Севярынца і Змітра Дашкевіча.