Журналістка з Брэста паскардзілася ў пракуратуру на міліцыянта

Інцыдэнт адбыўся 25 лістапада мінулага года, калі ў Брэсце праходзіла апошняя гульня чэмпіянату Беларусі па футболе, паведаміла Мілана Харытонава службе маніторынгу Беларускай асацыяцыі журналістаў.

“Пасля гульні я працягвала фатаграфаваць заўзятараў брэсцкай каманды, якія адзначалі заканчэнне сезону на стадыёне і на выхадзе з яго, – распавяла журналістка. – Менавіта там супрацоўнікі міліцыі пачалі затрымліваць найбольш актыўных заўзятараў. Калі я зняла момант затрымання, адзін з міліцыянтаў запатрабаваў спыніць фатаграфаванне і нават штурхнуў мяне з тратуара на праезную частку. Ён сцвярджаў, што працэс затрымання здымаць нібыта забаронена”.

Нягледзячы на спробы журналісткі давесці, што яна выконвае свае прафесійныя абавязкі, міліцыянт каля 10 хвілін замінаў ёй рабіць фотаздымкі. Ён спыніўся толькі пасля заўвагі ад супрацоўніка АМАПу.

У сваёй скарзе ў пракуратуру Мілана Харытонава просіць высветліць асобу гэтага прадстаўніка праваахоўных органаў, правесці праверку па гэтым факце, даць прававую ацэнку дзеянням міліцыянта і, калі яго прызнаюць вінаватым, – прыцягнуць да адказнасці.