Зміцер Вайцюшкевіч выпусціць альбом беларускага шансону

Акрамя таго, дадатковым CD плануецца выдаць песні на словы Уладзіміра Някляева, напісаныя ў апошнія гады, паведамляе "Тузін гітоў".

Вайцюшкевіч ужо запісваў цэлыя праграмы на вершы, як Генадзя Бураўкіна (альбом «Лірыка»), так і Уладзіміра Някляева («Танга з ружай»), але супрацу з паэтамі на гэтым не спыніў. У выканаўцы даўно было ў планах запісаць дыск у шансон-стылі на турэмную тэматыку. «Гэта будзе не шансон у разуменні французскім, не шансон у разуменні расейскім, а менавіта беларускі шансон», — патлумачыў Зміцер у інтэрвію Tuzin.fm. У пэўнай ступені гэты альбом тэматычна будзе працягваць апошнюю працу «Ваячак», бо і тут, і там гаворка вядзецца «пра чалавека, які апынуўся ў цяжкіх жыццёвых абставінах». Але ёсць і адрозьненне, бо новы дыск будзе больш разлічаны на масавую аўдыторыю, таму тут будзе менш музычных эксперыментаў. Варта дадаць яшчэ, што паэт Генадзь Бураўкін напісаў словы адмыслова да гэтага дыску.

Мяркуецца таксама, што будзе бонус да «Беларускага шансона». На другім дыску Вайцюшкевіч плануе запісаць песні на словы Уладзіміра Някляева, якія з'явіліся ў апошнія некалькі гадоў. Дакладнай даты рэлізу не называецца, але выканаўца пэўны, што гэта адбудзецца ў 2013 годзе.

Магчыма некаторыя новыя песні прагучаць ужо на найбліжэйшых канцэртах Змітра Вайцюшкевіча 1 лютага ў арт-клюбе «Кипяток» (Пецярбург), 2 лютага ў FAQ-Cafe (Масква).

Тым часам, альбом «Ваячак» стаў адным з фаварытаў 2012 году па версіі музычных экспертаў. На сайце Experty.by гэтая праца атрымала сярэднюю адзнаку ў 9,25 з 10 магчымых. Свае вынікі эксперты агучаць увесну.