Белдзяржуніверсітэт не будзе прасіць бясплатныя візы для замежных супрацоўнікаў

Паводле дамоваў з краінамі Еўрасаюза Беларусь выдае бясплатныя візы шэрагу катэгорый асобаў. Гэта студэнты, навукоўцы, удзельнікі спартовых, культурных праектаў. Напрыклад, такая дамова дзейнічае паміж Польшчай і Беларуссю.

- У адпаведнасьці з міжурадавым пагадненьнем, студэнты, якія накіроўваюцца ў Белаусь з мэтай навучаньня ў ВНУ або на курсах вызваляюцца ад аплаты збору за выдачу візы. Тое ж тычыцца вучоных, якія едуць з мэтай правядзеньня навуковых дасьледаваньняў. У асобных выпадках або па прынцыпу ўзаемнасьці ад аплаты за выдачу віз могуць быць вызвалены удзельнікі мерапраемстваў культурнага, навуковага, спартовага характару, - распавёў беларускай службе Польскага радыё прэсавы сакратар беларускай амбасады ў Варшаве Аляксей Зелянко.

Аднак асобы, якія супрацоўнічаюць з БДУ, у гэтым годзе можа чакаць расчараванне. Унівэрсітэт прыняў унутранае распараджэнне, што не будзе ў запрашэнні замежных грамадзянаў прасіць бясплатныя візы. Як вядома, у консульстве без адпаведнага запрашэння з беларускага боку бясплатную візу нельга атрымаць. Відаць, такім чынам галоўная вучэльня краіны вырашыла дапамагчы дзяржаве зарабіць валюту ў Год беражлівасці. Тлумачэнні прадстаўнікоў унівэрсітэту мы не змаглі атрымаць.