Пра Алеся Бяляцкага зняты дакументальны фільм

Личности

Фільм называецца "Вясна" (рэжысёр - Вольга Швед, 2012 г., Беларусь). Галоўныя героі, дакладней гераіні стужкі, – жонка Бяляцкага Наталля Пінчук і настаўніца Наталля Іллініч, якой дапамагла "Вясна", пасля таго як яе звольнілі з працы за актыўную грамадзянскую пазіцыю, піша "Белсат". Бяляцкі прысутнічае на архіўных здымках і кадрах кінахронікі, але ў фільме няма выказванняў самога Алеся, апроч апошняга слова ў судовай зале. І ўсё ж ён прамаўляе да нас – вуснамі сваёй жонкі, якая распавядае, чаму Алесь абраў у жыцці беларускі шлях, чаму заняўся абаронаю грамадзянаў ад уладаў, як паступова прызвычайваўся да думкі, што і сам станецца ахвяраю рэпрэсіяў, як жыў з усведамленнем непазбежнасці гэтага.

Гісторыя Наталлі Іллініч паказвае, у якую асабістую трагедыю ператвараецца кампанія цкавання ахвяры рэпрэсіяў, асабліва калі яна – вясковая настаўніца. Менавіта Алесь Бяляцкі і "Вясна" дапамагаюць асобам такім як Наталля Іллініч, сотням такіх асобаў.