Магілёў, абвешчаны культурнай сталіцай Беларусі і СНД, атрымаў з гэтай нагоды лагатып

Аўтарка малюнку - Кацярына Табанюхава, якая адлюстравала лагатып акварэллю, паведамляе Беларускае Радыё Рацыя.

Першая магілёўская ратуша была пабудаваная пасля надання Магілёву Магдэбургскага права ў 1578 годзе. Новая гісторыя ратушы пачалася ў ліпені 2008, калі аднавілі яе працу. Зараз тут размешчаны музей гісторыіі Магілева, - патлумачыў яго дырэктар Аляксей Бацякоў:

- Музей гісторыі Магілёва працуе з 1992 года. У нас сабраная калекцыя больш чым з васьмі тысяч экзэмпляраў асноўнага фонду, самыя каштоўныя нашы экспанаты - гэта прадметы, якія рэпрэзентуюць духоўную і матэрыяльную культуру магілёўцаў эпохі Магдэбургскага права. Нашыя цікавыя набыткі апошняга часу - гэта Статут Вялікага Княства Літоўскага і кніга Казіміра Семяновіча “Вялікае мастацтва артылерыі”.

Унікальным кампанентам адноўленай магілёўскай ратушы з’яўляецца вежавы гадзіннік, аўтарам і канструктарам якога стаў Генадзь Галоўчык.

Надпіс жа на лагатыпе “Магілёў - культурная сталіца краін Садружнасці Незалежных Дзяржаў і Рэспублікі Беларусь” зроблены па-руску. У 2013 годзе акрамя Магілёва статус культурнай сталіцы СНД займелі азербайджанская Габала і армянскі Гюмры.

Нагадаем, Магілёў быў абраны культурнай сталіцай Беларусі на 2013 год. Акцыя "Культурная сталіца Беларусі" стартавала ў 2010 годзе. Яе мэта - зрабіць больш даступнымі лепшыя дасягненні нацыянальнай культуры для жыхароў усіх куткоў Беларусі, спрыяць актывізацыі дзейнасці рэгіянальных устаноў культуры і мясцовых органаў улады, прыцягненню айчынных і замежных турыстаў у рэгіёны краіны.