У справе аб здрадзе дзяржаве з'явіўся яшчэ адзін падазраваны

«Допыт быў вельмі доўгі — з 10 да 15 гадзін. Мяне дапытваў следчы Алег Барысевіч, які займаецца справай Андрэя Гайдукова. Ён заявіў, што мае паказанні і паказанні Гайдукова разыходзяцца, і таму будзе праводзіцца дадатковае расследаванне. І мяне са сведкаў пераводзяць у падазраваныя», — апавёў Ілля Багданаў радыё "Свабода".

Актывіст лічыць, што многія пытанні следчага ўвогуле не тычыліся Гайдукова, і што яны задаваліся, каб сабраць нейкую дадатковую інфармацыю. На частку пытанняў Багданаў палічыў за лепшае не адказваць увогуле.

Хлопец дадаў, што яму паведамілі пра перавод Андрэя Гайдукова ў Мінск. Але сам ён мусіць з'яўляцца на допыты ў Віцебск. Чарговы раз яго выклікаюць на допыт 9 студзеня.

Ілля Багданаў — сябра аргкамітэту па стварэнні партыі БХД. Андрэя Гайдукова ён ведае яе намесніка кіраўніка незарэгістраванай суполкі «Саюз маладых інтэлектуалаў». Андрэя Гайдукова вінавацяць паводле крымінальнага артыкулу «Здрада дзяржаве ў форме агентурнай дзейнасці», супраць яго заведзена крымінальная справа, і цяпер у ёй з'явіўся яшчэ адзін падазраваны.

Гайдукова затрымалі ў Віцебску 8 лістапада нібыта падчас закладкі тайніка са звесткамі, якія могуць цікавіць замежныя спецслужбы. З таго часу ён знаходзіцца пад вартай: спачатку ў мінскім СІЗА КДБ, потым у віцебскім СІЗА, і з 22 снежня яго зноў перавезлі ў Мінск.

Паводле Іллі Багданава, у дачыненні да яго сьледчы Алег Барысевіч вырашыў не прымяняць меру стрымання — хлопца пакуль пакінулі на волі.