Гомельскія НДА пратэстуюць супраць знішчэння унікальных драўляных будынкаў Гомеля

Цягам апошніх год у горадзе Гомелі склалася сітуацыя, якая моцна турбуе шмат каго з жыхароў гораду ды прадстаўнікоў грамадзянскай супольнасці, пішуць "Сильные новости". У межах выканання генеральнага плану рэканструкцыі абласнога цэнтра, адбываецца знішчэнне гістарычнай драўлянай забудовы Гомеля ў Цэнтральным раёне, ў тым ліку ў раёне вуліц Валатаўская – Парыжскай Камуны.

Між іншым, незалежныя эксперты, этнографы, гісторыкі, прадстаўнікі грамадзянскай супольнасці адзначаюць, што менавіта гістарычная драўляная архітэктура з'яўляецца адметнаю рысай Гомелю. На жаль, на сённяшні дзень даводзіцца канстатаваць, што частка ўнікальных будынкаў ужо знішчана і не можа быць адноўлена. Лёс астатніх - пад вялікім пытаннем: працэс іх руйнавання спынены праз запатрабаванне Міністэрства культуры, якое зараз разглядае пытанне аб прысваенні гэтым дамам статусу гісторыка-культурных помнікаў. Умяшальніцтва Міністэрства культуры ў гомельскую сітуацыю стала магчымым пасля калектыўнай работы па зборы неабходных дакументаў, выкананай актывістамі грамадскага аб’яднання ГМКГА “Талака” і сябрамі мясцовай філіі “Таварыства Беларускай Мовы імя Францыска Скарыны”.

У сувязі з усім вышэй пазначаным прадстаўнікі грамадзянскай супольнасці Гомеля і Гомельская вобласці выказваюць глыбокую заклапочанасць тым, што працэс знішчэння гістарычнага цэнтра Гомеля ідзе без узгаднення з зацікаўленай часткай грамадства. Грамадзянскія актывісты занепакоеныя, што руйнаваннем драўляных дамоў канца ХІХ – пачатку ХХ стагоддзя наносіцца вялікая шкода гістарычнай, духоўнай, культурнай спадчыне Гомеля.

Гомельскія НДА заклікаюць неадкладна правесці шырокія грамадскія слуханні па праблеме, з абавязковым удзелам прадстаўнікоў мясцовых уладаў, Міністэрства культуры, Міністэрства архітэктуры, культурных установаў ды грамадскіх аб’яднанняў, прадстаўнікоў зацікаўленых грамадскіх арганізацый, незалежнай ды дзяржаўнай прэсы.

Грамадскасць патрабуе зрабіць неадкладныя захады для таго, каб унікальныя драўляныя будынкі Гомеля, пры рэканструкцыі адзначаных вуліц, не знішчаліся б, але захоўваліся для далейшага выкарыстання ў культурных ды турыстычных мэтах (гэта можа быць стварэнне музея пад адкрытым небам, стварэнне комплекса “Стары горад” і інш.).

Прадстаўнікі НДА мяркуюць, што неабходна распрацаваць з удзелам дзяржаўных і незалежных гісторыкаў, культуролагаў, этнографаў, а таксама з прыцягненнем шырокага кола грамадства, Канцэпцыю захавання культурнай спадчыны Гомелю, якая будзе забяспечваць і гарантаваць выратаванне галоўных унікальных гістарычных помнікаў Гомельшчыны".