Беларускі пісьменнік і перакладчык Дзмітры Плакс узнагароджаны Шведскай акадэміяй

Личности

Дзмітры Плакс стала жыве ў Стакгольме ўжо амаль дваццаць гадоў, піша радыё "Свабода". За гэты час добра вывучыў шведскую мову ды неаднаразова перакладаў вядомых шведскіх аўтараў на беларускую мову. У ягоным перакладзе выйшла, напрыклад, кніга «Піпі Доўгаяпанчоха» Астрыд Ліндгрэн, а зборнік паэзіі культавай шведскай аўтаркі Катарыны Фростэнсан па-беларуску быў адзначаны ў спісе намінантаў на прэмію часопісу «ПрайдзіСвет» за лепшую перакладную кнігу 2011 года.

Але спадар Плакс не толькі папулярызуе шведскую літаратуру за мяжой. Ён шмат перакладае беларускіх пісьменнікаў на шведскую мову. Дзякуючы менавіта Змітру Плаксу ў Швецыі выйшлі апошнім часам дзве кнігі Барыса Пятровіча — «Фрэскі» і «Плошча», паэтычны зборнік Андрэя Хадановіча «Вольныя вершы». Цяпер рыхтуецца кніга Ўладзімера Някляева «Вяртанне Веры». У шведскай пэрыёдыцы рэгулярна з'яўляюцца творы шмат якіх іншых беларускіх аўтараў у перакладах спадара Плакса.

Акрамя літаратурных перакладаў Дзмітры Плакс мае на сваім творчым рахунку тое, што зрабіў, быўшы стваральнікам і нязменным кіраўніком беларускай службы Радыё Швецыя (2004 — 2009). Цяпер ён піша п’есы ды робіць на Радыё Швецыя спектаклі пра знакавых асобаў розных краінаў свету. 14 лютага ў гэтым радыё-тэатры прагучыць ягоная радыёп’еса пра Алеся Бяляцкага.