Створаны водар "Белая Русь"

Водар «Белая Русь», які можа стаць араматычным сімвалам нашай краіны, мае працоўную назву «Жаданне прахалоды», піша "Наша ніва". Пасля нанясення парфумы на скуру, на вуснах з’яўляецца салодкі смак.

«Гэта такі спецыфічны ход. — кажа Гройсман. — Проста я вельмі люблю Беларусь, вось і хацелася перадаць пры дапамозе водару гэтае бязмежнае адчуванне прастору і свабоды, якое ёсць у нашай краіне».

Насамрэч, водар атрымаўся цікавым — досыць лёкім, і пры гэтым запамінальным. Сафія Гройсман у свой час з водарам «Трэзор» пераўзышла па папулярнасці знакамітую «Шанэль нумар пяць», таму новы водар можа стаць не менш папулярным.

Падчас скайп-канферэнцыі з беларускімі журналістамі спадарыня Гройсман абвергла чуткі, што стварала «асабісты» водар для Лукашэнкі.

«Я б стварыла для яго добры водар, але пакуль мне гэта не прапаноўвалі».

Пра Беларусь Сафія Гройсман узгадвае з цеплынёй — яна нарадзілася ў Любчы, і ў апошні свой прыезд нават знайшла родную хату.

«У дзяцінстве ў мяне не было цацак, таму я гулялася з кветкамі. — узгадвае Гройсман. — Менавіта дзіцячыя ўспаміны, уражанні і дапамаглі мне стаць парфумерам».

«Белая Русь», калі яна з’явіцца на прылаўках, будзе дарагой парфумай — у яе ўваходзяць рэдкія інгрыдыенты.

«Правільная назва парфумы — „Белая Русь“, без „нумар пяць“, проста я зрабіла дзесяць розных варыянтаў водару, і найлепшым апынуўся пяты,  — смяецца Гройсман. — Гэтай парфумай могуць карыстацца і мужчыны, і жанчыны. Спадзяюся, дзякуючы яму Беларусь стане больш вядомай у свеце».

Сафія Гройсман нарадзілася ў Беларусі, у Любчы (Навагрудскі раён). У вайну бацькі партызанілі, бацька выратаваў маці з гета. У 1960-м яе сям’я пераехала ў Польшчу, а пасля ў ЗША. Там Сафія стала зоркай парфумерыі — яна стварыла ледзь не самыя яскравыя водары апошніх 30 гадоў. Працавала з Івам Сен-Ларанам, Кэльвінам Клейнам, фірмай «Ланком». Распрацоўвала «персанальныя» водары для многіх вядомых людзей.