Мікалая Уласевіча аштрафавалі за непадпарадкаванне супрацоўнікам міліцыі

Личности

Падчас выбарчай кампаніі у верасні міліцыянты спынілі на выхадзе з пад’езда дома ў Астраўцы кандыдата ў дэпутаты Мікалая Ўласевіча і абвінавацілі яго ў распаўсюдзе агітацыйных улётак, паведамляе радыё "Свабода".

Пазней на яго склалі пратакол, у якім напісалі, што ён не падпарадкаваўся супрацоўнікам міліцыі, адмовіўся паказваць сумку. У той самы дзень у машыне Ўласевіча, а таксама ў доме ў вёсцы Варняны правялі ператрусы.

Уласевіч абскардзіў дзеянні міліцыянтаў у Генпракуратуру, запатрабаваў прадстаўлення дазволаў на правядзенне ў яго ператрусаў, а таксама пратаколаў вобшукаў, якія не мог атрымаць адразу.

Па гэтай справе было праведзена восем судовых паседжанняў. Уласевіч кажа, што суд не прыняў да ўвагі ніводнага доваду з яго боку, у тым ліку паказанняў ягонага сведкі, а таму з рашэннем суду не згодны і мае намер яго абскарджваць.

Ён лічыць рашэнне суду палітычна матываваным, паколькі падчас выбарчай кампаніі ён узняў пытанні карупцыі, службовага злоўжывання ў раёне, а таксама тэму будаўніцтва атамнай станцыі. Менавіта за гэта, перакананы Ўласевіч, яму і помсцяць мясцовыя ўлады.