ПЭН-цэнтр прысудзіў прэміі Фядуту, Булгакаву, Ляхоўскаму ды Краўцэвічу

Прэмія імя Алеся Адамовіча прысуджаная Аляксандру Фядуту за кнігу турэмнай лірыкі «Американские стихи» і Валеру Булгакаву за кнігу публіцыстыкі «Беларусь 1994–2004 г.г.: разбудова дзяржавы і пераслед нацыі», паведамляе радыё «Свабода».

Прэмія імя Францішка Багушэвіча прысуджаная Уладзіміру Ляхоўскаму за кнігу «Ад гоманаўцаў да гайсакоў. Чыннасць беларускіх маладзёвых арганізацый у 2-й палове XIX ст. — 1-й палове XX ст. (да 1939 г.) і Алесю Краўцэвічу за кнігу «Гедымін (1316–1341). Каралеўства Літвы і Русі».

Цырымонія ганаравання лаўрэатаў адбудзецца на пачатку 2013 году.

Прэмія імя Алеся Адамовіча была заснаваная Беларускім ПЭН-цэнтрам у 1996 годзе, праз два гады пасьля смерці пісьменьніка і грамадскага дзеяча, на знак пашаны да ягонага імя. Прэмія прысуджаецца за найлепшыя публіцыстычныя творы, надрукаваныя ў прамінулым годзе.

Прэмія імя Францішка Багушэвіча — штогадовая літаратурная прэмія Беларускага ПЭН-цэнтру. Заснаваная ў 1994 годзе. Традыцыйна ўручаецца 22 сакавіка (да Дня Волі) за выдатную гістарычную прозу аўтарам кніг, якія спрыяюць абуджэнню пачуццяў гістарычнай самасвядомасці і нацыянальнай незалежнасці.