Любоў Кавалёва названая праваабаронцай году

Личности

Праваабаронцай году названая Любоў Кавалёва, маці расстралянага Уладзіслава Кавалёва, паведамляе радыё "Свабода". Адвакатаміі году названыя Аліна Шостак і Альвіна Дрыго, якія баранілі ў судах маладафронтаўцаў. Журналістам году стаў Андрэй Пачобут, які знаходзіцца пад крымінальным пераследам.

Па традыцыі ўсе прэміі ўручалі былыя ляўрэаты. Прэмію Андрэю Пачобуту ўручаў карэспандэнт Радыё Свабода Алег Груздзіловіч, які адзначыў прафесійнасць Андрэя пры асвятленні падзеяў у Беларусі, яго мужнасьць. Андрэй Пачобут некалькі разоў трапляў за краты, але гэта не спыніла яго дзейнасці: выходзячы на волю, ён працягвае рабіць усё вельмі прафесійна, аддана.

Андрэй Пачобут праз відэасувязь падзякаваў за ўручэнне гэтай прэміі і адзначыў, што ён, як і іншыя беларускія журналісты, прагне паведамляць з Беларусі добрыя навіны, але пакуль часта даводзіцца паведамляць пра розныя складаныя рэчы, не вельмі прыемныя тым, хто хацеў бы бачыць Беларусь дэмакратычнай, развітай краінай. Тым не менш ён працягвае сваю працу.

Прэмію адвакатам Аліне Шостак і Альвіры Дрыго ўручала Тамара Сідарэнка, былая адвакатка Уладзіміра Някляева, якую потым пазбавілі адвакацкай ліцэнзіі — пасля таго як яна абараняла палітвязняў Плошчы. Яна адзначыла, што абедзьве намінанткі на прэмію — мужныя жанчыны, вельмі прафесійныя адвакаты, і нават у гэтых умовах, нягледзячы на рызыку страціць прафесію, яны бяруцца абараняць удзельнікаў дэмакратычнага руху і робяць гэта вельмі прафесійна.

Прэмію Любові Кавалёвай, маці асуджанага на расстрэл за тэракт у мэтро Уладзіслава Кавалёва, уручыў праваабаронца Беларускага Хэльсінскага камітэту Гары Паганяйла. Ён не стаў каментаваць саму справу, але адзначыў, што Любоў Кавалёва праявіла вялікую мужнасць, адданасць у змаганні зь дзяржаўнай машынай, якая па-ранейшаму нецывілізавана распраўляецца са сваімі грамадзянамі. Ёй не выдалі цела сына, не паведамілі, дзе ён пахаваны. Псіхалагічны ціск на яе працягваецца, але яна не скараецца, і дзякуючы яе і іншых намаганням, як спадзяецца Гары Паганяйла, калі-небудзь гэтае пытанне аб адмене смяротнага пакараньня будзе вырашана ў Беларусі.

А пакуль Любоў Кавалёва застаецца адным з самых актыўных сябраў кампаніі «За адмену смяротнага пакарання ў Беларусі». Гэтыя яе заслугі былі адзначаныя, і за гэта яна атрымала прэмію. У адказ Любоў Кавалёва падзякавала за прэмію, паведаміла, што ёй дагэтуль вельмі цяжка, але яна бачыць свой грамадзянскі абавязак у тым, каб дапамагаць іншым у вырашэнні гэтай праблемы.