Паказ дакументальнага фільма Мэцью Эйкерса "Марына Абрамавіч: У прысутнасці мастака"

Югаслаўская мастачка Марына Абрамавіч называе сябе "бабуляй перформанса". І мае на тое ўсе падставы. Сёння ў гэтым кірунку сучаснага мастацтва ёй няма роўных. Упершыню Марына Абрамавіч звярнула на сябе увагу арт-супольнасці ў 1974 годзе. Дакументальны фільм Мэцью Эйкерса "Марына Абрамавіч: У прысутнасці мастака" (Marina Abramović: The Artist Is Present) распавядае пра падрыхтоўку Марыны да сваёй рэтраспектыўнай выставы ў Музеі сучаснага мастацтва ў Нью-Ёрку.

Перад паказам адбудзецца дыскусія "Беларускі кантэкст: ад перформансу да акцыянізму". На прыкладзе творчасці перформераў Людмілы Русавай, Ігара Кашкурэвіча, Алеся Пушкіна, аб’яднання "Бум-Бам-Літ", дзейнасці фестывалю NAVINKI  і інш. (прэзентацыю падрыхтуе Таццяна Арцімовіч) запрошаныя госці Міхаіл Гулін (мастак), Віктар Пятроў (дырэктар міжнароднага фестываля арт-перформансу NAVINKI), Аляксандр Сарна (філосаф, перформер, медыя-аналітык), Ілля Сін (празаік, мастак-акцыяніст) падзеляцца вопытам правядзення сваіх перформансаў ды акцый, а таксама паспрабуюць вызначыць, як Беларусь прадстаўлена ў міжнародным кантэксце гісторыі перформансу. Мадэратар - Вольга Шпарага (філосаф, рэдактар партала "Новая Эўропа").

Месца правядзення: Галерэя "Ў" (прасп. Незалежнасці, 37, а). Пачатак у 18.00.

Уваход вольны!

Паводле Галерэі "Ў"