"Мадэ ін Беларусь: сучаснае беларускае мастацтва - канец "партызанскага" руху?"

Сёлета альманах сучаснай беларускае культуры "pARTisan" святкуе свой юбілей. Паўстаўшы 10 гадоў таму як альтэрнатыва афіцыйнаму мастацкаму дыскурсу, "pARTisan" на доўгія гады стаўся фактычна адзінай вольнай пляцоўкай для друкаванага мастацкага выказвання. Менавіта на старонках альманаха былі зафіксаваны найважнейшыя падзеі з жыцця альтэрнатыўнай арт-супольнасці, дэклараваліся мастацкія маніфесты, прэзентаваліся мастакі, якія не мелі шанцаў апынуцца ў абсягу афіцыйнага дыскурсу.

Сёння сітуацыя ў мастацкім асяроддзі Беларусі змянілася: сучаснае мастацтва перастала быць альтэрнатыўным (яскравы прыклад - сёлетняя Трыенале сучаснага мастацтва, дзе актуальныя мастацкія практыкі натуральна ўпісаліся ў афіцыйны кантэкст). Таму ў "pARTisan" ўзніклі пытанні, найперш да сябе: ці застаецца сёння партызанская стратэгія актуальнай? І калі так - хто ёсць ворагам сучаснаму “партызану”?

Але "партызанскія" пытанні - хутчэй, нагода ўвогуле паразважаць пра стан сучаснага беларускага мастацтва і культуры ў цэлым, а таксама паспрабаваць вызначыць тыя брэнды/антыбрэнды, арыентыры і каштоўнасці, якія сёння ствараюць вобраз сучаснай Беларусі.

У дыскусіі возьмуць удзел:

• Валянцін Акудовіч, філосаф
• Вольга Гапеева, паэтка, лінгвістка, дырэктарка беларускай філіі "HALMA" - міжнароднай сеткі літаратурных дамоў
• Артур Клінаў, мастак, літаратар, галоўны рэдактар "pARTisan"
• Андрэй Кудзіненка, кінарэжысёр
• Сяргей Шабохін, мастак, куратар, рэдактар інтэрнэт-партала "АртАктывіст"
• Вольга Шпарага, філосаф, рэдактар інтэрнэт-партала "Новая Эўропа"

Мадэратар - Таццяна Арцімовіч

Запрашаюцца ўсе жадаючыя!

Паводле Галерэі "Ў"