Пазбаўленая офісу “Вясна” працягне сваю дзейнасць

Пра гэта прадстаўнікі “Вясны” заявілі ў сувязі з выкананнем працэдуры канфіскацыі офісу арганізацыі, якую распачалі 26 лістапада судовыя выканаўцы суду Першамайскага раёну Мінска. Офіс Праваабарончага цэнтру быў аформлены, як прыватная маёсмасць Алеся Бяляцкага, асуджанага на 4,5 гады зняволення з канфіскацыяй маёмасці.

Усе ахвяры парушэнняў правоў чалавека па-ранейшаму могуць разлічваць на нашу дапамогу і падтрымку, цьвердзіцца ў заяве прадстаўнікоў “Вясны”.

“Мы працягнем адстойваць каштоўнасці правоў чалавека, змагацца за іх выкананне беларускімі ўладамі, інфармаваць беларускае грамадства і міжнародную супольнасць аб рэальным стане з правамі чалавека ў Беларусі”,- заяўляюць прадстаўнікі “Вясны”.

У заяве адзначаецца таксама, што “зняволенне Алеся Бяляцкага і наяўнасць палітвязняў – індыкатар крытычна кепскай сітуацыі з правамі чалавека ў краіне”.

“За час існавання офісу Праваабарончага цэнтру “Вясна” яго наведалі тысячы грамадзян, якім аказвалася прававая дапамога, збіраліся сродкі для падтрымкі рэпрэсаваных, праводзіліся прэс-канферэнцыі, сустрэчы, трэнінгі і семінары. Мы заўсёды ажыццяўлялі сваю дзейнасць адкрыта, нягледзячы на адсутнасць рэгістрацыі арганізацыі з 2003 года і звязаную з гэтым пагрозу пераследу”,- нагадалі праваабаронцы.

Намеснік старшыні “Вясны” Валянцін Стэфановіч адзначыў, што арганізацыя будзе шукаць новы офіс, каб мець магчымасць прымаць грамадзянаў, якім неабходная дапамога. Такую працу немагчыма весці праз інтэрнэт, патлумачыў ён. Часова грамадская прыёмная праваабарончага цэнтру будзе дзейнічаць у офісе Руху “За Свабоду”.

Нагадаем, што прысуд Алесю Бяляцкаму быў вынесены 24 лістапада 2011 года судом Першамайскага раёну Мінска. На дадзены момант праваабаронца адбывае зняволенне ў Бабруйскай калоніі №2.

“Пакуль мы хутчэй не чакаем вызвалення Алеся Бяляцкага, колькі спадзяемся на гэта. Бо павінны прайсці вельмі складаныя палітычныя працэсы для таго, каб беларускія ўлады адумаліся і прынялі правільнае рашэнне”,- сказаў Службе інфармацыі “ЕўраБеларусі” юрыст, былы адвакат Павел Сапелка падчас канфіскацыі офісу “Вясны”.