У Полацку пройдзе рок-фестываль «LIVEinROCK»

Канцэрт адбудзецца ў полацкім «ДК Шкловалакно» 15 снежня, паведамляе Tuzin.fm.

Полацкі рок-клюб з дапамогай паэткі Леры Сом ладзіць рок-фэст ужо шосты год запар. У 2007-2008 гадах ён меў назву «Ноч Ваўкалака». Такім чынам арганізатары аддалі даніну павагі полацкаму князю Усяславу Чарадзею, але мясцовыя ідэолагі настойліва параілі назву змяніць, таму цяпер фэст называецца нейтральна - «LIVEinROCK». У розныя часы пераможцамі фэсту прызнаваліся гурты «Да!Бл…», Jenowa, «Інфра-чырвоны выдых» і Metalgues.

Як распавядае завадатарка фэсту Лера Сом, асноўная мэта мерапрыемства застаецца нязменнай. «Мы хочам падтрымаць тых выканаўцаў, якія вырашылі спяваць на беларускай мове. І мы радуемся, як дзеці, калі штогод атрымліваем вялікую колькасьць заяваў ад патэнцыйных канкурсантаў. Гэта значыць, што наша мова жыве».

Сёлета фэст мяркуецца правесці 15 снежня на адной з самых вялікіх канцэртных пляцовак Полацка – ДК «Шкловалакно». Зараз вядуцца перамовы з хэдлайнерам, якім мае стаць славуты беларускі гурт.

Заяўкі на ўдзел у конкурсе прымаюцца на e-mail: [email protected] да 30 лістапада ўключна. У заяўцы павінна быць указана назва гурта, кароткая інфармацыя пра гурт, кантактная інфармацыя, фота, не больш за дзве песьні ў фармаце mp3 (толькі на беларускай мове), тэксты песень, якія будуць выконвацца на конкурсе. Па традыцыі, акрамя віншаванняў, пераможцу чакае і прыемны бонус – бясплатны запіс песні ў прафесійнай студыі ў Мінску.