Наглядную скаргу Любові Кавалёвай у Вярхоўным судзе дагэтуль не разгледзелі

Личности

Любоў Кавалёва паведаміла радыё "Свабода": "Наглядную скаргу я падавала напрыканцы верасня. І праз месяц прыйшла гэтая адпіска. Яны не мелі права выконваць смяротны прысуд, пакуль мы не скарыстаем усе сродкі абароны. Але тады яны вельмі спяшаліся. Падаць наглядную скаргу павінен быў яшчэ сам Улад і ягоны адвакат. Але адваката да Ўлада тады не пусцілі для напісання нагляднай скаргі. Адвакат спрабаваў патрапіць, але Ўлада ўжо не было ў жывых. Яны ўсё разлічылі і ўсё распланавалі".

У скарзе былі выкладзеныя парушэнні крымінальна-працэсуальнага кодэксу падчас следства і суду над Уладзіславам Кавалёвым.

Згадваецца і відэазапіс з метро з элементамі мантажу, і вынікі экспертызы, згодна з якімі ні на вопратцы, ні на целе ў Дзмітрыя Канавалава і Ўлада Кавалёва не выяўлена слядоў выбуховых рэчываў. Таксама ў скарзе гаворыцца, што Кавалёва фактычна пазбавілі права на абарону: пакуль вялося следства, адваката да Ўлада дапусцілі толькі адзін раз. Адвакат мог сустракацца з падабаронным толькі падчас следчых дзеянняў, а ў судзе такая магчымасць давалася, калі Кавалёва прыводзілі ў клетку перад пачаткам працэсу. Нічога не змянілася і пасля вынясення прысуду: адваката не пускалі ў СІЗА КДБ. Акрамя таго, на судзе большасць хадайніцтваў абароны былі адхіленыя.

11 красавіка 2011 году на станцыі "Кастрычніцкая" метрапалітэну спрацавала магутнае самаробнае выбуховае прыстасаванне. 11 чалавек загінулі на месцы. Вінаватымі ў тэракце суд прызнаў Дзмітрыя Канавалава і Ўладзіслава Кавалёва. Яны былі асуджаныя да смяротнага пакараньня. 17 сакавіка 2012 году стала вядома, што прысуды прыведзеныя ў выкананне.

7 кастрычніка ў Амстэрдаме Любоў Кавалёва агучыла пачатак кампаніі "Вярніце цела". Кампанія ўключае ў сябе тры аспекты: выдачу цела Ўлада Кавалёва сям’і для пахавання і адмену смяротнага пакараньня ў Беларусі; вяртанне целаў выкрадзеных і забітых апанентаў рэжыму Лукашэнкі і справядлівае расследаванне акалічнасцяў іх смерці; вызваленне палітвязняў, кожны з якіх цяпер у небяспецы.