Праваабаронцы асудзілі адпраўку Змітра Дашкевіча ў турму

Міжнародная федэрацыя правоў чалавека і ПЦ “Вясна” лічаць, што гэтыя рашэнні з’яўляюцца часткай агульнай рэпрэсіўнай тэндэнцыі ў Беларусі, гаворыцца ў заяве, распаўсюджанай праваабаронцамі.

“Яны таксама лічаць, што гэта яшчэ адзін эпізод пераследу ў дачыненні да грамадзянскай супольнасці, накіраваны на прыгнечанне апанентаў рэжыму і прымяненні супраць іх усё большага ціску. Рашэнне суда Мазырскага раёна давяло агульную колькасць палітычных зняволеных, якія адбываюць зняволенне ў турмах з вельмі цяжкімі і рэпрэсіўнымі умовамі, да чатырох”,- гаворыцца ў заяве, размешчанай на сайце ПЦ “Вясна”.

Міжнародная федэрацыя правоў чалавека і ПЦ “Вясна” “заклікаюць беларускія ўлады спыніць пераслед супраць сп. Дашкевіча і неадкладна і безумоўна вызваліць яго, як і ўсіх палітычных зняволеных у Беларусі”.

Нагадаем, што суд Мазырскага раёна прызнаў Змітра Дашкевіча “злосным парушальнікам” рэжыму калоніі №20 і накіраваў яго ў турму з яшчэ больш жорсткімі ўмовамі.