Аштрафаваны на 500 тысяч рублёў Валер Булгакаў - ужо не галоўны рэдактар Arche

Личности

Таксама канфіскаваны ўвесь прыбытак ад продажу часопіса Arche на агульную суму 875 тысяч рублёў, паведамляе радыё "Свабода".

Суд таксама пастанавіў сканфіскаваць затрыманыя ў Булгакава выданні ў лічбе 194, ацэненыя больш як на шэсць мільёнаў рублёў.

14 верасня Валер Булгакаў прыехаў у Гродна, каб прадставіць новую кнігу з серыі часопіса Arche "Саветызацыя Заходняй Беларусі" аўтарства гісторыка Яна Шумскага.

На сустрэчу прыйшлі супрацоўнікі падатковай інспекцыі і зрабілі "кантрольную закупку". Пасля гэтага яны сканфіскавалі каля двухсот асобнікаў часопіса і кніг, на якія не было накладных. 

Валер Булгакаў паведаміў, што перастаў быць галоўным рэдактарам часопіса Arche, які ачольваў з 1998 году. Новым рэдактарам прызначаны Алесь Пашкевіч. Такое рашэнне прыняў заснавальнік Андрэй Дынько, каб уратаваць выданьне ад закрыцьця, патлумачыў спадар Булгакаў.

Валер Булгакаў у інтэрв'ю "Свабодзе": "Затрыманне ў Горадні было пачаткам аперацыі беларускіх спецслужбаў супраць нашага творчага асяроддзя. 21 верасня ў друкарню ў Мінску, дзе друкуецца "Arche“, прыходзяць супрацоўнікі дэпартаменту фінансавых расследаванняў. На наступным тыдні адбываецца выняцце дакументаў. Што самае прыкрае, гэта суправаджаецца праслухоўваннем тэлефонаў. 2 кастрычніка супрацоўнікі КДБ і міліцыя арыштоўваюць больш за пяць тысяч асобнікаў нашых выданняў, кніжак і невялікую колькасць часопіса "Arche“. Пасля гэтага падзеі пачынаюць развівацца ў катастрафічным рэжыме. 4 кастрычніка дэпартамэнт фінансавых расследаванняў арыштоўвае рахунак "Arche“ з той нагоды, што, будучы ў шоку пасля канфіскацыі 2 кастрычніка, я папросту не знайшоў у сабе сілы данесці запатрабаваныя дакументы да іх, хоць прыйшоў на допыт на наступны дзень. УДФР выклікае Андрэя Дынько, заснавальніка часопіса "Arche". Пасля гутаркі са следчым ён прымае рашэнне, што адзіны спосаб уратаваць часопіс у дадзенай сітуацыі — гэта памяняць галоўнага рэдактара".