Сяргея Каваленку паставілі на прафілактычны ўлік

На працягу бліжэйшых двух гадоў былы палітвязень павінны адзначацца ў той самай інспекцыі, супрацоўнікі якой ініцыявалі супраць Сяргея Каваленкі крымінальную справу за парушэнне рэжыму так званай “хатняй хімі”, якую ён атрымаў за вывешванне 7 студзеня 2010 года бел-чырвона-белага сцяга на навагодняй ёлцы ў Віцебску, паведамляе сайт Праваабарончага цэнтру “Вясна”.

8 кастрычніка Сяргея Каваленку выклікалі ў крымінальна-выканаўчую інспекцыю і паведамілі пра ягоныя новыя абавязкі – адзначацца ў інспекцыі раз на тры месяцы, пакуль судзімасць не будзе “пагашана”.

Нагадаем, што сябра Кансерватыўна-хрысціянскай партыі БНФ Сяргей Каваленка быў вызвалены з калоніі ўвечары 26 верасня пасля памілавання прэзідэнтам Беларусі.