У Гродне адбудзецца прэзентацыя вынікаў міжнароднага даследавання на тэму лакальнай памяці пра вайну

Старт праекта "Памяць пра вайну з лакальнай перспектывы" быў абвешчаны ў красавіку 2012 года. Ад таго часу каманда праекта - Аляксей Ластоўскі (Беларусь), Ірына Склокіна (Украіна), Раман Хандожка (Расія) - збірала матэрыялы, якія паказваюць спосабы фармавання гістарычнай памяці грамадства, паведамляе "Твой стыль". Навукоўцаў цікавілі два першыя пасляваенныя дзесяцігоддзі і іх роля ў стварэнні вобразаў Вялікай Айчыннай вайны. Але перадусім - мясцовыя адрозненні ў, здавалася б, маналітным Савецкім Саюзе.

Менавіта таму аб'ектам даследвання былі абраныя тры буйныя абласныя цэнтры: Гродна, Харкаў і Растоў-на-Доне - кожны з багатай гісторыяй і ўласным досведам вайны. Аб'ядноўвае іх тое, што ў час вайны яны былі акупаваны нямецкімі войскамі, хоць перыяд акупацыі доўжыўся розны час.

У прыватнасці, навукоўцы вывучалі назвы вуліц і плошчаў, газетныя публікацыі, экспазіцыі музеяў - менавіта як сродкі фармавання памяці грамадства.

Прэзентацыя вынікаў даследвання пройдзе 1 кастрычніка 2012 года па адрасе: Гродна, вул. Будзёнага, 48а-38. Пачатак ў 18.30.

Даследаванне ажыццяўлялася ў рамках праекта "Гістарычная майстэрня Еўропа" пры падтрымцы фонда "Памяць, адказнасць, будучыня".