Другі Міжнародны кангрэс даследчыкаў - паварот да Беларусі

Больш за 300 навукоўцаў з Беларусі ды іншых краін свету, якія займаюцца даследваннямі Беларусі ў самых розных сферах, сабраліся на адкрыццё кангрэса ў канферэнц-залі каунаскага гатэля "Park Inn".

Гасцей і ўдзельнікаў кангрэса павітаў пасол Літоўскай Рэспублікі ў Беларусі Лінас Лінкявічус. Ён адзначыў, што яму прыемна бачыць столькі беларусаў - энтузіястаў, навукоўцаў - у самым сэрцы Літвы. Пасол нагадаў пра нашае агульнае мінулае - Вялікае княства Літоўскае, а таксама пра агульныя каштоўнасці і вартасць іх аднаўлення.

- Кангрэс даследчыкаў Беларусі - унікальная магчымасць для ўзаемадзеяння, для кантактаў, для разумення, - зазначыў Лінас Лінкявічус. - Патрэбна, каб гэта мерапрыемства стала шматгадовай традыцыяй.

Прадстаўнік мэрыі Каунаса перадаў віншаванне ўдзельнікам кангрэса ад імя мэра горада Андрыюса Купчынскаса і выказаў меркаванне, што кангрэс дапаможа беларусам знайсці шляхі да дэмакратызацыі і пабудовы добрасуседства. Таксама з прывітальным словам выступіла прадстаўнік Універсітэта Вітаўта Вялікага, у аўдыторыях якога галоўным чынам і будуць адбывацца пасяджэнні секцый кангрэса.

Адзін з галоўных арганізатараў, дырэктар Інстытута палітычных даследаванняў “Палітычная сфера” Андрэй Казакевіч выказаў спадзяванне, што Другі Міжнародны кангрэс даследчыкаў Беларусі будзе працаваць на тое, каб раскрыць дасягненні, абазначыць праблемы тэарэтычнага характару, а таксама раскрыць асобныя праблемы ў межах пэўных дысцыплін. Па словах Андрэя Казакевіча, важна суадносіць вынікі, дасягнутыя падчас пленарных пасяджэнняў і працы секцый кангрэса, з больш шырокім кантэкстам.

- Кангрэс даследчыкаў Белаарусі - гэта паварот да Беларусі, - сказаў Андрэй Казакевіч. - Гэта значыць, каб Беларусь як праблема была ўключаная ў даследчыцкія практыкі. Гэта значыць, каб Беларусь была ўпісаная ў рэгіянальны кантэкст, то бок каб можна было параўнаць яе з іншымі краінамі, і перадусім з краінамі-суседзямі. Дзеля таго, каб зразумець, чым мы падобныя на іх, а чым адрозніваемся ад іншых грамадстваў.

Кангрэс будзе працаваць тры дні і завершыцца 30 верасня.